वाढेगावच्या सुमित सुभाष दिघे यांचा मोठा सन्मान ; IIT-IIM इंदूर मधून संयुक्त 'MSDSM' पदवी संपादन

सांगोला - वाढेगावचे सुपुत्र सुमित सुभाष दिघे यांनी शैक्षणिक क्षेत्रात मोठी भरारी घेतली आहे. भारतीय तंत्रज्ञान संस्थान (IIT) इंदूर आणि भारतीय व्यवस्थापन संस्थान (IIM) इंदूर यांच्या संयुक्त विद्यमाने राबविण्यात येणारा अत्यंत प्रतिष्ठित, मास्टर ऑफ सायन्स इन डेटा सायन्स अँड मॅनेजमेंट (MSDSM), हा दोन वर्षांचा पदव्युत्तर अभ्यासक्रम त्यांनी यशस्वीरित्या पूर्ण केला आहे.

गावापासून IIT-IIM पर्यंतचा प्रवास, सुमित यांचे प्राथमिक शिक्षण पाचवी ते सातवी वाढेगाव प्रशाला येथे झाले. पुढे त्यांनी आठवी ते दहावी सांगोला विद्यामंदिर येथे माध्यमिक शिक्षण पूर्ण केले. सांगोल्याच्या मातीतून सुरू झालेल्या या प्रवासाने आज IIT आणि IIM सारख्या देशातील सर्वोच्च संस्थांपर्यंत मजल मारली आहे.  त्यांचे वडील सुभाष शामराव दिघे हे वाढेगावचे रहिवासी असून सेवानिवृत्त माध्यमिक शिक्षक आहेत.

डेटा सायन्स आणि व्यवस्थापनाचा संगम, आजच्या कृत्रिम बुद्धिमत्ता (Artificial Intelligence), जनरेटिव्ह एआय (Generative AI), मशीन लर्निंग आणि डेटा सायन्सच्या युगात उद्योग, बँकिंग, आरोग्य, उत्पादन, ई-कॉमर्स, शासन व्यवस्था आदी सर्वच क्षेत्रांमध्ये डेटा-आधारित निर्णयप्रक्रियेला मोठे महत्त्व प्राप्त झाले आहे. हीच गरज लक्षात घेऊन IIT इंदूर आणि IIM इंदूर यांनी डेटा सायन्समधील तांत्रिक कौशल्ये आणि व्यवस्थापनातील निर्णयक्षमतेचा संगम घडवून आणणारा हा अनोखा अभ्यासक्रम विकसित केला आहे.

या अभ्यासक्रमात कृत्रिम बुद्धिमत्ता, मशीन लर्निंग, डेटा अॅनालिटिक्स, सांख्यिकी, प्रोग्रामिंग, बिझनेस अॅनालिटिक्स, वित्त, विपणन, धोरणात्मक व्यवस्थापन, ऑपरेशन्स आणि नेतृत्व यांसारख्या विषयांचा समावेश आहे. उद्योग क्षेत्रासाठी आवश्यक आधुनिक कौशल्ये विकसित करण्यावर येथे विशेष भर दिला जातो.

देशातील दोन अग्रगण्य संस्थांची साथ - IIT इंदूर ही भारत सरकारची राष्ट्रीय महत्त्वाची संस्था असून संशोधन, विज्ञान आणि तंत्रज्ञान शिक्षणासाठी देशातील अग्रगण्य संस्थांपैकी एक आहे. IIM इंदूर ही देखील राष्ट्रीय महत्त्वाची व्यवस्थापन संस्था असून उच्च दर्जाचे व्यवस्थापन शिक्षण, संशोधन आणि नेतृत्व विकासासाठी राष्ट्रीय तसेच आंतरराष्ट्रीय स्तरावर ओळखली जाते. 

या दोन्ही प्रतिष्ठित संस्थांच्या संयुक्त विद्यमाने हा अभ्यासक्रम राबविला जात असल्यामुळे विद्यार्थ्यांना तांत्रिक उत्कृष्टतेबरोबरच व्यवस्थापन आणि उद्योग क्षेत्राची व्यापक समज विकसित करण्याची सुवर्णसंधी मिळते. दीक्षांत समारंभात पदवी प्रदान, नुकत्याच IIT इंदूर येथे पार पडलेल्या दीक्षांत समारंभात IIM इंदूरचे संचालक प्रा. हिमांशु राय आणि IIT इंदूरचे संचालक  प्रा. सुहास जोशी यांच्या हस्ते सुमित सुभाष दिघे यांना Master of Science in Data Science and Management (MSDSM) ही संयुक्त पदव्युत्तर पदवी प्रदान करण्यात आली.

सुमित सुभाष दिघे हे व्यावसायिकरित्या डेटा सायंटिस्ट म्हणून कार्यरत असून त्यांनी या संयुक्त पदव्युत्तर शिक्षणाद्वारे डेटा सायन्स आणि व्यवस्थापन या दोन्ही क्षेत्रांतील प्रगत ज्ञान आत्मसात केले आहे.  वाढेगावच्या या सुपुत्राच्या उत्तुंग शैक्षणिक यशाबद्दल त्यांचे गाव, शाळा, नातेवाईक आणि सर्व स्तरांतून कौतुक व अभिनंदन होत आहे. सांगोला तालुक्याचे नाव राष्ट्रीय स्तरावर उज्ज्वल करणाऱ्या सुमित यांच्या यशामुळे ग्रामीण भागातील विद्यार्थ्यांसमोर एक नवा आदर्श निर्माण झाला आहे.